فقرالرگه ینگهدن هم یخشیراق صحی خدمتلر کورسهتیش و ساغلیک خدمتلرینی یخشیلش مقصدیده، صحت سکتوریده ینگیلیک کیلتیریش و ادارهلر آرهسیده همکارلیک بوییچه ییغین بوگون توشدن آلدین افغانستان اسلامی امیرلیگی نینگ رئیسالوزراء اداری اورینباسری حرمتلی مولوی عبدالسلام حنفی باشچیلیگیده، عامه ساغلیک وزیری، مدافعه، ایچکی ایشلر، عالی اوقوو، مالیه وزیرلیگی همده عمومی استخبارات ریاستی وکیللری اشتراکیده بولیب اوتدی.
بو ییغینده مملکت صحت سکتوریدهگی موجود بولگن توسقلر، همده صحی خدمتلر کیفیتینی و صحی ایشلرنی باشقریشنی یخشیلش اوچون مؤثر یوللر حقیده بحث و فکر آلمهشیلدی.
شونینگدیک، فقرالرنی دوالش اوچون کیرهکلی قولیلیکلرنی یرهتیش، شفاخانهلرنی معیاری طبی اسباب-اوسکونهلر بیلن تجهیزلش، صحی خدمتنی کنگیتیریش، امارتی و خصوصی شفاخانهلرده اولیم حالاتینی کملتیریش، بالهلر صحتی بولیملرنی کوچیتریش، کسلیکلرنینگ آلدینی آلیشگه توجه قیلش، اوزاق ولایت و اولسوالیکلردهگی صحی مرکزلرنی تقویهلش، سرطان کسلیگینی تشخیص و معالجه قیلشده امارتی شفاخانهلر آرهسیده همکارلیک یرهتیش و مریضلرنی دوالش جریانینی آسانلشتریشگه تأکید قیلندی.
بو ییغینده شونینگدیک صحی کادرلر ظرفیتینی آشیرش، داکتر و صحی ایشلاوچیلراوچون تعلیمی و تخصصی پروگراملر ترتیبلش، متخصصلرگه صحی مرکزلرده ایش زمینهسینی یرهتیش، مریض و اولرنینگ همراهلری اوچون
شفاخانهلرده مناسب و معیاری محیط یرهتیش، همده داکتر و صحی پرسونلنینگ مریض و اولرنینگ همراهلری بیلن یخشی معامله و رفتارده بولیشی مسئلهلری هر تامانلمه محاکمه قیلینیب، یوقاریدهگی موضوعلر بوییچه کیرهکلی تصمیملر قبول قیلندی.
یکونده علاحیده کمیتهلرگه صحت خدمتینی یخشیلش بوییچه اوز یوللرینی ترتیب و تنظیم قیلش و کیلگوسی ییغینده تقدیم ایتیش وظیفهسی تاپشیریلدی.#
