افغانستان اسلام امیرلیگی ریاست الوزراء اداری اورین باسری حرمتلی مولوی عبدالسلام حنفی، بوگون توشدن آلدین ابو علی سینای بلخی نینگ ایکّینچی ملی و خلق ارا تخصصی کورگزمهسیده قتنشدی و نطق سوزلهدی.
عامه ساغلیق وزیرلیگی نینگ تشبّثی بیلن تشکیل ایتیلگن اوشبو کورگزمهده، ریاست الوزراء اقتصادی اورین باسری حرمتلی ملا عبدالغنی برادر، اسلام امیرلیگی نینگ بیر قطار مسئوللری، چیت ایل مملکتلری نینگ دیپلوماتلری، داکترلر، صنعتکارلر و سرمایه یاتقیزووچیلر هم اشتراک ایتگن ایدیلر.
ریاست الوزراء اداری اورین باسری اوز نطقیده، ساغلیقنی سقلش ترماغی هم باشقه ترماقلر کبی مملکتدهگی تحمیلی اوروشلر عاقبتیده کوپلب زیان کورگنینی و بو ترماقنی قیته ایاققه تورغیزیش اوچون، زمان مقتضالریگه موافق عیارلنیشی مقصدیده عمومی اعتبارگه ضرورت بارلیگینی ایتدی.
اونینگ قوشیمچه قیلیشیچه، مملکتده اسلام امیرلیگی حاکم بولگنیدن سونگ، بو ترماقده، اینیقسه دارو تولید قیلیش، طبی جهازلرنی تیرتیش و معیارلشتیریش بولیملریده سیزیلرلی رواجلنیشلر قولگه کیریتیلگن.
حرمتلی مولوی عبدالسلام حنفی ایچکی تولیداتلردن فایدهلنیش و ساغلیقنی سقلش ترماغینی کوچهیتیریش حقیده تأکیدلب شوندهی دیدی: «اسلام امیرلیگی خصوصی ترماقنی، اینیقسه دارو تولید قیلیش و طبی جهازلرنی تیارلش یولیده حرکت قیلهیاتگن ایچکی سرمایه یاتقیزووچیلر و صنعتکارلرنی تولقین شکلده قوللب-قوتلهیدی.»
او سوزی نینگ دوامیده، تولید ایتیلهیاتگن دارولرنینگ صفتلی بولیشی اوستیده تأکیدلب، خلق نینگ صفتلی دارولرگه قولی ییتیشی عامه ساغلیقنی تأمینلش و انسانلر جانینی سقلش مصلحتیده علاحیده اهمیتگه ایگه ایکنینی و بو ایش جمعیت نینگ ساغلیقنی سقلش ترماغی همده داکترلرگه بولگن ایشانچینی مستحکملشینی بیان ایتدی.
ریاست الوزراء اداری اورین باسری، دارو و صحی محصولاتلر تولید قیلیشده خلق ارا معیارلر و استندردلرنی عملگه آشیریش، صفتنی کفالتلش، مصؤنیت و جهان تولیداتلری بیلن رقابت قیلیش قابیلیتی نینگ اینگ مهم عاملی ایکنینی و بو مسله مملکتده دارو توزیش صنعتینی دواملی رواجلنتیریشگه سبب بولیشینی ایتدی.
او شونینگدیک چیت ایللرده یشهیاتگن افغان متخصصلریدن رخصتی کونلریده کسللرنی دواملی داولش، یاش داکترلرنینگ ظرفیتینی آشیریش همده طبی مهارتلر و صحی سیستملر کوچیریش بوییچه ساغلیقنی سقلش ترماغی بیلن همکار بولیشلرینی سورهدی.
مولوی عبدالسلام حنفی جنابلری، بوگونگی کونده کسللیکلرنینگ کوپچلیگی مملکت ایچیده داولنهیاتگنینی خاطرلب، اسلام امیرلیگی مسئوللری برچه کسللیکلرنی مملکت ایچیده داولش زمینهسینی یرهتیش اوچون جدی سعی-حرکت قیلهیاتگنینی و هیچ بیر کسل دوالنیش اوچون مملکتدن تشقریگه چیقمسلیگی مقصد قیلینگنینی بیلدیردی.
او نطقینینگ آخیریده، کابلدهگی «الشفاء» کسلخانهسینی معیاریلشتیریش مسلهسیگه قرهتیب، اوشبو کسلخانه حاضرگی وقتده تعمیرلنهیاتگنینی، ضرورت بولگن ایلغار جهازلرنی ساتیب آلیش جریانی و متخصص کادرلرنی ایشگه آلیش ایشلری آلیب باریلهیاتگنینی قید ایتدی.#
