د افغانستان اسلامي امارت د رياست الوزراء اداري مرستيال محترم مولوي عبدالسلام حنفي پرون ماښام د سوداګرۍ او پانګونې خونې مسؤلينو او يو شمېر ملي سوداګرو سره وکتل.
په دې ليدنه کې هغوی په هيواد کې د اقتصادي وضعيت، سوداګرۍ او پانګونې په اړه خبرې وکړې او وې ويل، د سوداګرو او پانګوالو لپاره تر ټولو مهمه مسئله د ځاني او مالي امنيت تأمين، د هغوی ملاتړ او د حکومت له لوري ورته د اسانتياوو رامنځته کول دي، چې خوشبختانه اسلامي امارت د سوداګرو او پانګوالو په ملاتړ سره د هغوی امنيت په غوره ډول تأمين کړی او دا کار په هيواد کې د سوداګرو او پانګوالو د هڅونې لامل شوی دی.
د سوداګرۍ او پانګونې خونې مسؤلينو او يادو سوداګرو همداراز د سوداګرۍ په وده کې د ترانسپورټ رول او د توکو لېږد ته اشاره وکړه او د اسلامي امارت مسؤلينو څخه يې وغوښتل، ترڅو د سوداګريزو توکو لېږد رالېږد او نښلوونکو لارو ته ځانګړې پاملرنه وکړي.
د رياست الوزراء اداري مرستيال محترم مولوي عبدالسلام حنفي پر دې کتنې د خوښۍ څرګندولو تر څنګ وويل، سوداګر او پانګه وال د هيواد په پرمختګ کې مهم رول ترسره کوي.
د رياست الوزراء اداري مرستيال زياته کړه، اسلامي امارت په مختلفو له هغې ډلې د صادراتو، توليدي فابريکو او د کانونو استخراج په برخو کې کورنيو او بهرنيو پانګه والو ته د پانګونې زمينه برابره کړې ده.
محترم مولوي عبدالسلام حنفي سوداګرو او پانګوالو ته د اسلامي امارت د پاملرنې په تړاو د ډاډ تر څنګ له ملي سوداګرو وغوښتل، ترڅو له موجود فرصت څخه په استفادې د هيواد په وده او ابادۍ کې لا ډېر رول ولوبوي.#
