د افغانستان اسلامي امارت د ریاستالوزراء اقتصادي مرستیال محترم ملا عبدالغني برادر اخوند سمنګان ولایت ته د خپل سفر پرمهال نن د سمنګان له والي محمد شعیب رسالت او د زلزله ځپلو ستونزو ته د رسیدنې لپاره د ټاکل شوو کمېټو مسوولینو سره د ولایت په مقام کې وکتل.
د ریاستالوزراء اقتصادي مرستیال په مختلفو برخو کې د ټاکل شوو کمېټو له مسوولینو څخه د دوی اړوندو برخو کې د ترسره شوو کړنو راپورونه وغوښتل.
د یادو کمېټو مسوولینو په خپلو راپورونو کې وویل، تر دې مهاله یې د زلزلې له امله ټولو زیانمنو شوو هېوادوالو ته لومړني خوراکي توکي، درمل، البسه، خیمې او د سرپناه اړین توکي رسولي. هغوی زیاته کړه، د سطحي ټپيانو عاجله درملنه شوې او هغوی چې اوږدې درملنې ته اړتیا لري، نغدي مرستې ورسره شوې دي.
محترم ملا صاحب د یادو کمېټو د ترسره شوو کارونو مننه وکړه او په هغوی یې ټینګار وکړ چې ژر تر ژره د سمنګان ولایت په ټولو زلزله ځپلو سیمو کې د شهیدانو، ټپيانو، په بشپړ ډول د نړېدلو کورونو او په نیمه ډول د زیانمن شوو کورونو سروې بشپړه کړي او پر زیانمنو خلکو د اسلامي امارت مرستې په شفاف ډول ووېشي.
په سمنګان ولایت کې د وروستۍ زلزلې له امله ۱۳ هېوادوال شهیدان او ۳۴۴ ټپيان شوي دي. دغه راز ۴۱۹ کورونه او ۱۲ جوماتونه په بشپړ ډول نړېدلي او ۵۹۳ کورونه په نیمه ډول زیانمن شوي دي.
