افغانستان اسلام امیرلیگی ریاست الوزراء اداری اورین باسری حرمتلی مولوی عبدالسلام حنفی بوگون توشدن آلدین چین خلقی جمهوریتی نینگ کابل ده گی ایلچیسی جناب ژاوشینگ اونینگ همراهلری بیلن اوچره‌شدی.
اوچره‌شوو نینگ مقصدی افغانستان و چین اورته‌سیده‌گی علاقه‌لرنی مستحکملش و همکارلیکنی کینگه‌یتیریش ایدی، ایلچی ژاوشینگ اوزاق ییللر دوامیده ایکّی دولت دوستانه مناسبتلرگه ایگه ایکنلیگینی تأکیدلب، بو علاقه‌لر دایمي روشده رواجلنیب باره‌یاتگنینی بیلدیردی.
ایلچی شونینگدیک، اسلام امیرلیگی تامانیدن قوشنی دولتلردن کیلگن افغان قاچقینلری ایشلرینی یخشی باشقره‌یاتگن لیگینی تأکیدله‌دی همده اوز دولتی نینگ قاچقینلرگه ۱۶۰ ته تیار اوی و ۳۰ میلیون یو‌ان نینگ نقد یاردمینی بیرگنینی معلوم قیلدی. چین نینگ افغان خلقی اوچون تورلی ساحه‌لرده یاردملرینی دوام ایتتیریلیشینی بیلدیردی.
جناب ژاوشینگ چین تدبیرکارلری و کمپنیلری نینگ افغانستانده سرمایه یاتقیزیشگه قیزیقیشینی تأکیدلب، بو سرمایه یاتقیزوچی‌لر افغان خلقیگه کوپلب ایش اورینلری یره‌تیشینی بیلدیردی.
سونگ ریاست الوزراء اداری اورین باسری حرمتلی مولوی عبدالسَلام حنفی چین نینگ قاچقینلرگه کورستگن یاردملرینی قدرلب، ایکّی مملکت اورته‌سیده‌گی علاقه‌لر مستحکم و دوستانه ایکنلیگینی تأکیدله‌دی همده اسلام امیرلیگی بو مناسبتلرنی ینه‌د-ه رواجلنتیریشگه اینتیله‌یاتگنینی بیلدیردی.
او افغانستان نینگ طبيعي بایلیکلری و کانلریگه هم اعتبار قره‌تیب، مملکتده سرمایه یاتقیزیش اوچون کتّه امکانیتلر بارلیگینی ایتدی. اسلام امیرلیگی خارجي سرمایه یاتقیزوچی‌لرنی قوللب-قوّتله‌یدی و شرکتلر همده سرمایه گذارلر اوچون ضرور قوله‌یلیکلرنی یره‌ته‌دی.
اوچره شوو سونگیده حرمتلی مولوی عبدالسلام حنفی اسلام امیرلیگی نینگ برچه دولتلر، اینیقسه چین بیلن یخشی مناسبتلر و همکارلیکنی ایسته‌یاتگنینی تأکیدله‌دی.
قید ایتیش جایزکی، چین ایلچیسی بو مملکت دولتی تامانیدن ریاست الوزراء اداری اورین باسرینی چین و جنوبی آسیا توقیزینچی کوزگزمه سی (CSA) اشتراک قیلیب نطق سوزلشیگه چیقیردی.
