افغانستان اسلام امیرلیگی ریاست الوزراء اداری اورین باسری حرمتلی مولوی عبدالسلام حنفی بوگون توشدن آلدین هرات صناعت شهرچه‌سی نینگ بیشینچی باسقیچی آچیلیشی، تورتینچی باسقیچ ییر ایگه‌لیک حجتلرینی تاپشیریش مراسمی و هرات بیلیم یورتی مهندسلیک فاکولته‌سی کورگزمه‌سیده اشتراک ایتیب، نطق سوزله‌دی.
مذکور مراسم هرات ولایتی صناعت اتاقی تشبثی بیلن تشکیل ایتیلگن بولیب، اونده هرات ولایتی حاکمی شیخ نور محمد اسلام جار امیرلیک نینگ اَیریم مسووللری، هراتلیک تجار و سرمایه‌دارلر قتنه‌شدی.
حرمتلی مولوی عبدالسلام حنفی، هرات صناعت نینگ ینگی باسقیچی نینگ آچیلیشی و تورتینچی باسقیچ ییر حجتلری نینگ تاپشیریلیشی مناسبتی بیلن ممنونلیگینی اظهار ایتیب، اسلام امیرلیگی برچه تجارلر، سرمایه‌دارلر و صناعتچیلرنی قوللب-قوّتلشینی، اولر اوچون ضرور قوله‌یلیکلرنی یره‌تیشینی تأکیدله‌دی.
شونینگدیک، او امیرلیک رهبریتی کیلگوسیده هم تجارلر، سرمایه‌دارلر و صناعتچیلر اوچون برچه امکانیتلرنی یره‌تیشگه اینتیلیشینی ایتیب، بو باره‌ده عملگه آشیریله‌یاتگن ایشلردن بیری دولت اداره‌لرینی رقملشتیریش جریانی ایکنلیگینی، اوشبو لایحه یکونلنگچ، اداره‌لرده بوروکراتيه کمه‌ییشینی و اینیقسه تجالر، سرمایه‌دارلر و صناعتچیلر اوچون کتّه قوله‌یلیکلر یوزه‌گه کیلیشینی تأکیدله‌دی.
ریاست الوزراء اداری اورین باسری حرمتلی مولوی عبدالسلام حنفی اولرگه خطاب قیلیب: ایچکی محصولاتلر صفتینی آشیریشگه اینتیلینگ، شونده اولر نینگ صفتی خارجي محصولاتلر بیلن رقابتلشه‌دی و حتا که اولردن یوقاری بوله‌دی. شو بیلن بیرگه، خلق نینگ ملي محصولاتلرگه ایشانچی و حرمتی آشه‌دی.
شونینگدیک، خارجدن محصولات آلیب کیرووچیلر صفتلی محصولات وارد قیلیشگه حرکت قیلسینلر و صفتسیز تاوه‌رلرنی آلیب کیریشدن تيیلسینلر، صفتسیز محصولات ایشلب چیقریش یاکه آلیب کیریشگه اورینگنلر ایسه قانون اساسیده جزالنه‌‌دیلر.
شونینگدیک حرمتلی مولوی عبدالسلام حنفی، قوشنی دولتلردن افغان مهاجرلری نینگ وطنیگه قَیتیشی مسأله‌سیگه توخته‌لیب، برچه ملي تدبیرکارلر و مالیوي امکانیتی بار انسانلرنی قَیتیب کېله‌یاتگن مهاجرلرگه امکان قدَر یاردم بیریشگه چقیردی.
شو بیلن بیرگه، ریاست الوزراء اداری اورین‌باسری هرات بیلیم یورتی انجنیرلیک فاکولته‌سی کورگزمه‌سیده هم نطق سوزلب، فاکولته طلبه‌لری تامانیدن یره‌تیلگن نوآورلیکلرنی یوقاری بهاله‌دی.
بونده‌ی کورگزمه‌لر برچه بیلیم یورتلرده عنعنه‌گه ایلنیشی کیره‌ک. چونکه بو آرقه‌لی طلبه‌لر اوز محنت میوه‌لرینی کوریب، ینه‌ده کوپراق رغبت و اشتیاق بیلن علمي ایزلنیش آلیب باره‌دیلر دېدی.#
