افغانستان اسلام امیرلیگی باش وزیری حرمتلی الحاج ملا محمدحسن آخند، اسلام دنیاسی بیردملیگی تشکیلاتی (رابطة العالم الاسلامي) رئیسی باشچیلیگیده‌گی هیئت بیلن، اولر رسمي تشریف بیلن کابلگه کیلگن ایدی اوچره‌شوو اوتکزدی.
اوچره‌شوو بوگون توشدن سونگ ارگ نینگ گلخانه قصریده بولیب اوتدی. اونده تشقی ایشلر وزیرلیگی سرپرستی حرمتلی مولوی امیرخان متقی همده ریاست الوزراء عمومی دفتری مقامی نینگ باشلیغی حرمتلی داکتر ملا عبدالواسع هم اشتراک ایتدیلر. حرمتلی باش وزیر مهمانلرگه خوش کیلیبسیز دیب ایتر ایکن، الله تعالیدن بو سفر افغانستان و تشکیلات اورته‌سیده‌گی علاقه‌لر و همکارلیکلر نینگ دوامچیسی بولیشینی تیله‌دی.
شوندن سونگ، (رابطة العالم الاسلامي) تشکیلاتی رئیسی افغانستانگه کیلگنیدن ممنونلیگینی بیلدیریب، افغانستان بیز نینگ و بوتون اسلام عالمی نینگ یوره‌گیده جای آلگنینی، اولر افغان خلقیگه نسبتاً اسلامي برادرلیک تویغوسینی حس قیلیشلرینی ایتدی.
او اسلام امتی بونده‌ی ییغیلیشلرگه محتاج ایکنینی تأکیدله‌دی. هیات باشلیغی شیخ دوکتور العیسی افغانستان کتّه تاریخگه ایگه ایکنینی ایتیب، الله دن اونگه برکه و یخشیلیکلر تیله‌دی.
او افغانستان نینگ دنیا بیلن همکارلیکده بولیشی ضرورلیگینی، معین معمالر بولیشی ممکنلیگینی، خصوصاً، خوارج دیب اته‌لووچیلر کبی کوچلر اسلامگه زیان ییتکزه‌یاتگنینی، اولر نینگ اسلام نامینی بولغه‌گنینی ایتدی و بو کوچلرگه قرشی کوره‌شده افغانستان بیلن بیر ایکنلیکلرینی بیلدیردی.
شونینگدیک، او افغانستانده کوپلب ییریک علمالر بارلیگیگه اعتبار قره‌تیب، اولر نینگ موجودلیگی و رابطة العالم الاسلامي کینگشی همده کنفرانسلرده فعال اشتراکی اولرنی خورسند قیله‌یاتگنینی تیلگه آلدی.
حرمتلی شیخ دوکتور محمد بن عبدالکریم العیسی باش وزیرگه مراجعت قیلیب: سیز کوچلی تشقی ایشلر وزیریگه ابگه‌سیز، او بیلن مکه مکرّمه‌ده اوچره‌شدیم. او بیز نینگ افغانستانگه بولگن محبتیمیزنی ینه‌ده آرتتیردی دیدی. او تشقی ایشلر وزیری نینگ اسلامي برادرلیکنی مستحکملش باره‌سیده‌گی حرکتلرینی یوقاری بهاله‌دی.
افغانستان اسلام امیرلیگی باش وزیری حرمتلی الحاج ملا محمدحسن آخند افغانستان و سعودیه عربستانی اورته‌سیده‌گی تاریخي علاقه‌لرنی ایسلب اوتدی.
اینیقسه، سابق شوروی اتفاقیگه قرشی جهاد ییللریده سعودیه عربستانی نینگ افغانلر و مجاهدلرگه کورستگن یاردملرینی قدرلشلرینی ایتدی.
علما و دیني ییتکچیلر نینگ اسلام امتینی معمالردن چیقریشده‌گی رولی، حتا حکومتلردن هم مهم‌راق ایکنینی تأکیدلب، اولر اوز مملکتلری رهبرلریگه مسلمانلر نینگ دردلریگه ییچیم تاپیشده باسیم اوتکزیشلری کیره‌کلیگینی ایتدی.
او فلطسین ده صهیونیست ریجیم تامانیدن مسلمانلر نینگ ظالملرچه شهید قیلینه‌یاتگنیگه اعتبار قره‌تیب، اسلام دنیاسی نینگ واسطه‌لری و امکانیتلریگه قره‌مه‌ی، بو یاووزلیکلر قرشیسیده سکوتده ایکنینی تنقید قیلدی.
او الله تعالیدن فلسطین خلقیگه یاردم بیریش روحینی مسلمانلر آره‌سیده اویغاتیشی کیره‌کلیگی حقیده علیحده تاکیدله‌دی.
شونینگدیک، حرمتلی شیخ دوکتور العیسی نینگ بو سفرینی مسلمانلر بیرلیگی، معمالر ییچیمی، ایکّی تامانله‌مه علاقه‌لر و همکارلیک نینگ مستحکملنیشیگه خدمت قیلیشی اوچون برکه‌لی بولیشینی سوردی.
اسلام امیرلیگی باش وزیری سعودیه عربستانی بیلن علاقه‌لر دوام ایتیشینی ایسته‌یاتگنینی بیلدیریب، شیخ دوکتور محمد بن عبدالکریم العیسی جنابلریدن حج زیارتی اوچون افغانستان سهمه‌سینی کوپه‌یتیریش مسأله‌سینی سعودیه رسميلری بیلن کوریب چیقیشنی سوردی.
شیخ دوکتور محمد بن عبدالکریم العیسی افغانستان باش وزیری نینگ گپلریدن منّتدارلیک بیلدیریب، علمالر نینگ فعال رولیگه قره‌تیلگن اعتبارنی یوقاری بهاله‌دی افسوسکی، اسلام عالمی نینگ بیاناتلری کوپ، عملي ایشلر ایسه کملیگینی ایتدی. او افغانستان خلقینی اسلام امتی نینگ اجره‌لمس بیر قِسمی صفتیده کوریشلرینی تأکیدله‌دی.
غزده‌گی مسلمانلر نینگ احوالی آغریقلی ایکنی، بو نسل‌کشلیک نینگ آچیق نمونه‌سی ایکنینی ایتدی. او دایمي روشده بو بوبیچه اوز مناسبتلرینی بیلدیرگنلیکلرینی و صادر بوله‌یاتگن ظالملیکلرنی قاره‌له‌گنلیکلرینی تأکیدله‌دی.
حرمتلی شیخ العیسی ایشانچ بیلن بیز اسلام امیرلیگی بیلن بیرگه‌میز. الله تعالی امیرلیک، رهبرلر و افغان خلقینی اسره‌سین، موفقیتلر بیرسین، بیز سیز بیلن فخرلنه‌میز دیدی. حج سهمیه‌سی حقیده‌گی پیشنهادنی تیگیشلی مسووللرگه ییتکزیشینی و اعتبار قره‌تیلیشینی امید قیلیشینی بیلدیردی.
یکونیده، ریاست الوزراء فاش وزیری شیخ دوکتور العیسی جنابلریدن سعودیه عربستانی رهبرلری و علمالریگه سلام و ایزگو تیلکلرینی ییتکزیشنی سوره‌دی و بو کبی سفرلر، علاقه‌لر و همکارلیکلر دوام ایتیشینی ایسته‌دی.
اوچره‌شوو یکونیده، شیخ دوکتور محمدبن عبدالکریم العیسی کعبه شریف نینگ غلافینی افغانستان اسلام امیرلیگی باش وزیری حرمتلی الحاج ملامحمد حسن آخندجنابلریگه ساوغه صفتیده تاپشیردی.#
