افغانستان اسلام امیرلیگی اسلامي ریاست الوزراء عمومي دفتری مقامی باشلیغی حرمتلی داکتر ملا عبدالواسع بوگون ایرته‌لب دولت اداره‌لری نینگ بیر ییللیک یوتوقلرینی بیان قیلیش برنامه سی نینگ آچیلیش مراسمیده قتنه‌شیب، نطق سوزله‌دی.
مذکور مراسم حکومت نینگ اخبارات و مطبوعات مرکزیده بولیب اوتدی. اونده امار‌ت نینگ کوپلب یوقاری مرتبه‌لی رسميلری هم اشتراک ایتدی. حرمتلی داکتر ملا عبدالواسع آچیلیش نطقیده دستوردن کوزلنگن اساسي مقصد - تورلی دولت اداره‌لری تامانیدن بیر ییل دوامیده عملگه آشیریلگن ایشلرنی خلق بیلن شفّاف طرزده بولیشیش ایکنینی تأکیدله‌دی.
اونینگ ایتیشیچه، جاري ییلگی دستورده چمه سی ۴۴ ته تورلی دولت اداره‌لری اوز فعالیتی حقیده معلومات بیریش بیلن بیرگه، مطبوعات خبرچیلری نینگ سواللریگه هم جواب قَیتره‌دی.
ریاست الوزراء عالی مقامی عمومی دفتری باشلیغی ییتکرمه لرنی حکومت و خلق اورته‌سیده باغلاوچی کوپریک دیب اتب، اسلام امیرلیگی خلق نینگ حقیقی معلوماتگه بولگن امکانیتلرینی آشیریش اوچون حرکت قیله‌یاتگنینی بیلدیردی.
او برچه مسووللرنی اوشبو جریانده صدقِ دلدن اشتراک ایتیشگه چقیردی و رسانه لردن حقیقتنی یاریتیشنی، تاکه دنیا افغانستان نینگ حقیقي منظره‌سینی کورسین، دیب سوردی.
حرمتلی داکتر ملا عبدالواسع تورت ییل مقّدم اسلام امیرلیگی حاکمیتنی قولگه آلگن وقتده مملکت آغیر اقتصادي، خوفسیزلیک، اجتماعي و مدني معمالرگه دوچ کیلگنینی، کوپلب دولت اداره‌لریده ایسه مأموري و اخلاقي فساد اوج آلگنینی تأکیدله‌دی.
او اسلام امیرلیگی الحمدلله، الله نینگ نصرتیگه، رهبریت نینگ قطعیتی و مسووللری نینگ صدقِ دل محنتلریگه ته‌یه‌نیب، مملکتده تورلی ساحه‌لرده مهم و ایجابي اصلاحاتلر و اوزگریشلر عملگه آشیرگنینی قید ایتدی.
شونینگدیک، داکتر ملا عبدالواسع عالیقدر امیرالمؤمنین حفظه الله تعالی نینگ عمومي عفو فرمانینی تاریخي و مثلی کوریلمه‌گن قدم دیب اته‌دی. او بو قدم افغانستان خلقینی ملي بیرلیک، بیردملیک و برادرلیککه چارله‌گنینی تأکیدله‌دی.
ریاست الوزراء عمومی دفتری مقامی باشلیغی نینگ ایتیشیچه، دولت توزیلمه‌سیده مهم اصلاحاتلر عملگه آشیریلگن، کیره کسیز و ضرور بولمه گن اداره‌لر توگه‌تیلیب، شفّافلیک تأمینلنگن. اسلام امیرلیگی ایچکی بودجه حسابیدن برچه دولت خدمتچیلری نینگ معاشلرینی تۉله‌شگه و باشقه رواجلنتیریش ایشلری بیلن شغللنیشگه موفق بولگن.
محترم داکتر ملا عبدالواسع اسلام امیرلیگی بوگونگی کونده دنیا نینگ قیریق دن آرتیق دولتی بیلن سیاسي، اقتصادي و سودا علاقه‌لریگه ایگه ایکنینی، اسلام امیرلیگی نماینده لری تورلی درجه‌لرده چیت مملکتلرگه تشریف بویوریب، ییریک خلق‌ارا ییغیلیشلرده قتنه‌شه‌یاتگنینی تأکیدله‌دی. اونینگ سوزلریگه کوره، یقینده روسيه فدراسیونسی اسلام امیرلیگینی رسماً تن آلدی امیدکه باشقه دولتلر هم شو یولدن بارسه لر.
ریاست الوزراء عمومی دفتری مقامی نینگ باشلیغی حرمتلی داکتر ملاعبدالواسع اوزی نینگ سوزلری اداغیده پاکستان و ایران دولتلریدن افغان مهاجرلرینی مجبوري چیقریب یوباریش مسأله‌سیگه توخته‌لیب، مهاجرلر نینگ قَیتیش جریانینی باشقریش اوچون ریاست الوزراء اداری اورین باسری حرمتلی مولوی عبدالسلام حنفي باشچیلیگیده مهاجرلر ایشلرینی کوریب چیقیش بوییچه عالي کمیسیون توزیلگنینی بیلدیردی. او کمیسیون مهاجرلرنی کوتیب آلیش، رویخطگه آلیش، تشیش، وقتینچه جایلشتیریش، طعام، ایچیملیک سووی و طبي خدمتلرنی تأمینلش بوییچه ضرور کورسه‌تمه‌لر بیرگنینی معلوم قیلدی.
بوگون ملي امتحانلر اداره سی اوز فعالیتینی یاریته‌دی و امیرلیک نینگ باشقه اداره‌لری ایسه کیلگوسی کونلرده مطبوعات اشتراکیده اوتگن بیر ییللیک فعالیتی و ایشلرینی افغانستان خلقی بیلن اورته گه قویشه دی. #
