د افغانستان اسلامي امارت د ریاست الوزراء سیاسي مرستیال محترم مولوي عبد الکبیر نن د ننګرهار د ګوشتې ولسوالۍ له يو شمېر قومي مشرانو او متنفذینو سره په داسې حال کې ولیدل چې د نورستان ولایت مرستیال والي هم حضور درلود.
راغلو قومي مخورو او مشرانو وویل، له څو لسیزو وروسته د ګوشتې ټولو سیمو ته د سیمه ییزې حکومتولۍ لمن غځېدلې او د ولسونو په همکارۍ سرتاسري امنیت تامین دی.
یادو قومي مشرانو د ولسونو اقتصادي، تعلیمي او روغتیايي وضعیت ته په اشارې وویل، د ګوشتې ولسونه لومړنیو خدماتو ته د لاسرسي په برخه کې لا هم ستونزې لري او اړتیا ده چې په سیمه کې د اقتصادي پياوړتیا او پراختیا لپاره بنسټيزې پروژې عملي شي.
وروسته د افغانستان اسلامي امارت د ریاست الوزراء سیاسي مرستیال محترم مولوي عبد الکبیر وویل، د لسیزو جګړو او یرغلونو له امله افغانستان او افغانان کړېدلي او زیانونه یې لیدلي دي.
محترم مولوي عبد الکبیر زیاته کړه، د اشغال له پای ته رسېدو او خپلواکۍ ګټلو وروسته اسلامي امارت د هېواد ابادي او اقتصادي پياوړتیا خپل لومړیتوب ګرځولی او د ګوشتې مخورو ته یې ډاډ ورکړ، چې د اقتصادي طرحو په پلي کولو سره به د بېکارۍ کچه راټيټه او اقتصادي توانمندي زیاته شي.#
