محترم مولوی عبدالسلام حنفی معاون اداری ریاست الوزراء امارت اسلامی افغانستان عصر امروز با مسئولین مؤسسهٔ خیریهٔ ای ایچ ایچ دیدار نمود.
در این دیدار نخست محترم یوسف بیلگین عضو هیأت رهبری مؤسسهٔ مذکور به نمایندگی از دیگران راجع به فعالیت‌ها، کارکردها و برنامه‌های این مؤسسه صحبت نمود.
وی افزود که مؤسسهٔ متذکره تا حال در زمینه‌های معارف، اعمار مساجد و دارالایتام‌ها کمک‌های قابل توجهی در ولایات مختلف افغانستان داشته و مسئولین آن سعی دارند فعالیت‌های خود را در زمینه‌های فوق به همهٔ ولایات گسترش دهند.
محترم یوسف بیلگین از کمک‌های توزیع شده از سوی این موسسه به مهاجرین افغان خبر داد و همچنان وعده سپرد که این موسسه در قسمت ساخت خانه‌ها برای مهاجرین عودت‌کننده در شهرک‌های مهاجرین نیز همکاری خواهد کرد.
متقابلاً محترم مولوی عبدالسلام حنفی معاون اداری ریاست الوزراء ضمن ابراز خرسندی از دیدار با مسئولین مؤسسهٔ خیریهٔ ای ایچ ایچ، از کمک‌های آن موسسه به مردم افغانستان ابراز قدردانی نمود.
معاون اداری ریاست الوزراء افزود که فعالیت نهادهای غیر دولتی خصوصاً مؤسسات خیریه جهت کمک به مردم از اهمیت زیادی برخوردار است و از آنان خواست تا فعالیت‌های خود را در زمینه‌های مختلف به تمام ولایات کشور گسترش دهند.#
