محترم ملا عبدالغنی برادر آخند معاون اقتصادی ریاست‌الوزراء امارت اسلامی افغانستان، امروز در دفتر کارش با میرویس عزیزی تاجر ملی و رئیس عمومی شرکت عزیزی انرژی گروپ و تیم تخنیکی موصوف، دیدار کرد.
در این دیدار، میرویس عزیزی گزارش پیشرفت کار پروژهٔ ده‌هزار میگاوات برق را به معاون اقتصادی ریاست‌الوزراء ارائه نمود.
محترم عزیزی گفت که پس از امضای تفاهمنامه، تیم‌های خود را همراه با تیم‌های تخنیکی وزارت‌های مربوطه به ولایات بغلان، بلخ، جوزجان، هرات و بامیان اعزام کرده که در جریان دو هفتهٔ گذشته، سروی ابتدایی شماری از پروژه‌ها را انجام داده و معلومات تخنیکی آن را جمع‌آوری نموده اند.
وی افزود که پروژهٔ تولید ده‌هزار میگاوات برق به سه فاز تقسیم شده که فاز اول آن ظرفیت تولید چهار هزار میگاوات برق را خواهد داشت.
به اساس معلومات مسؤلین شرکت عزیزی انرژی گروپ، کار عملی پروژه‌های موجود در فاز اول را به زودی با همکاری وزارت‌ها و ادارات مربوط آغاز می‌کند. همچنان آقای عزیزی خواسته‌های خود را نیز در این زمینه با معاون اقتصادی ریاست‌الوزراء شریک ساخت.
معاون اقتصادی ریاست‌الوزراء و مسؤلین وزارت‌ها و ادارات در مورد برآورده شدن خواسته‌های یادشده از همکاری کامل اطمینان دادند.
در پایان این دیدار، به هدایت محترم ملا عبدالغنی برادر آخند، یک کمیتهٔ مشترک از نمایندگان وزارت‌ها، ادارات مربوط و شرکت عزیزی انرژی گروپ ایجاد و مؤظف گردید تا کارهای پروژه‌های تولیدی ده‌هزار میگاوات برق را تعقیب و نظارت نموده و گزارش آن‌را به طور منظم با مقام معاونیت اقتصادی ریاست‌الوزراء شریک سازد.
